There was an error in this gadget

Thursday, August 7, 2014

দুই মিনিটৰ সাধু এটা



এটি এটিকৈ সুৰ বগাই বগাই তাই ৰামধেনুখন আঁকি দিলে কোঁৱৰৰ বুকুত|

ৰামধেনুৰ ৰঙেৰে ৰঙিয়াল, তাইৰ সুৰেৰে ৰাগিয়াল হৈ কোঁৱৰে ক’লে: "আ-হা! আঁহা না আমি পলাই যাওঁ সেই পাহাৰৰ সিপাৰে নেদেখা কোনো দেশলৈ| ৰাজমুকুট পৰিহাৰ কৰি জীয়াই থাকিম এক সাধাৰণ মানুহৰ দৰে| তোমাৰ সুৰ, মোৰ কলিজাৰ ৰং... আমি আঁকিম এখন নেদেখা চিত্ৰ|"

মনোমোহা গীত গাই গাই তাই ৰাজকোঁৱৰক শুৱাই দিলে| একেথৰে চাই ৰ’ল কিছু পৰ| কঁকালৰ খোঁচনিৰ পৰা শাণিত অস্ত্ৰ এপাত উলিয়াই বহুৱাই দিলে তেওঁৰ বুকুত|

কোঁৱৰৰ কলিজা ফালি ৰং উলিয়াই তাই গুচি গ’ল সুৰৰ পাহাৰ বগাই...|


-------------------------

তাই কেনি গ’ল?


(১)
তাই সাৰ পালে
নিজকে দাপোণত চালে
অলপ ৰং ঘঁহি তাই ৰঙিলী হ’ল
বৰষুণত মুকুতা বুটলিবলৈ গৈ
তাই আকৌ মটীয়া হ’ল

(২)
আকাশে গৰজিবলৈ ধৰিলে
ভয় খাই তাই বাউলী হ’ল
ছাঁতে লুকাব পৰাকৈ
তাই এটুপি চকুলো হ’ল
বেলি ওলালত গৰখীয়াটোৰ চকুতে বহি
দূৰ পাহাৰলৈ তাই গুচি হ’ল

(৩)
বনে বনে বগাই
তাইৰ হাবিয়াসবোৰ অৱশ হ’ল
নিজকে শাঁত পেলাবলৈ তাই
এটি পাহাৰীয়া জুৰি হ’ল
যাওঁ নাযাওঁ খোজেৰে
সাগৰৰ বুকুত তাই এদিন হেৰাই গ’ল

An Assamese Poem by Santanu Changmai

Assamese Poem by Santanu Changmai

টুকুৰা কবিতা
________
১)ৰাস্তা
পথ এৰি পেলাই
পথ বিচাৰিলেই
পথ পোৱা যায়
সেই পথৰ পথিক
অচিনাকি
আপোন

২)অস্তাচল
আবেলিৰ বেলি
মাৰ যায়
এখিলা শুকান পাত
সৰি পৰে
কবিৰ কফিৰ কাপত
ডুব যায়

৩)পানী-দোঙা
শিলৰ দলঙ
তলত পানী
ৰুপোৱালী মাছ
ভাগৰত বুটলিছে
এমুঠি জিৰণি
সাৰ নোপোৱালৈকে


Sunday, November 24, 2013

Assamese Poetry

শৈশৱৰে পৰা সপোনৰে সতে মোৰ লুকা ভাকু|
এটি সপোনে জিৰণি লৈছে মোৰ বুকুত মোৰ কলিজাটো সজোৰে খামুচি ধৰি|
সময় হ’লে ফুল ফুলিব, সুগন্ধি বিয়পিব- বুকুখন এখন জীপাল বাগিচা হ’ব!

Santanu Changmai

আবৃত্তি: Assamese Poem

জানো তুমি কবিতা নিলিখা...
যি দিনা লিখিবা
সেইদিনা মোৰ কথা ভাবিবা
শব্দৰ ফাঁকে ফাঁকে লুকাই
ম‍ই তাক ছন্দৰ পোচাক পিন্ধাম