Shopping Mall: Lady Killer, Assamese story

 

Basundhara- Assamese short story

Assamese story by Santanu Changmai

_________________________________________
assamese short story, story 2022, published story, বসুন্ধৰা, দৈনিক জনমভূমি

দুই মিনিটৰ সাধু এটা

এটি এটিকৈ সুৰ বগাই বগাই তাই ৰামধেনুখন আঁকি দিলে কোঁৱৰৰ বুকুত|

ৰামধেনুৰ ৰঙেৰে ৰঙিয়াল, তাইৰ সুৰেৰে ৰাগিয়াল হৈ কোঁৱৰে ক’লে: "আ-হা! আঁহা না আমি পলাই যাওঁ সেই পাহাৰৰ সিপাৰে নেদেখা কোনো দেশলৈ| ৰাজমুকুট পৰিহাৰ কৰি জীয়াই থাকিম এক সাধাৰণ মানুহৰ দৰে| তোমাৰ সুৰ, মোৰ কলিজাৰ ৰং... আমি আঁকিম এখন নেদেখা চিত্ৰ|"

মনোমোহা গীত গাই গাই তাই ৰাজকোঁৱৰক শুৱাই দিলে| একেথৰে চাই ৰ’ল কিছু পৰ| কঁকালৰ খোঁচনিৰ পৰা শাণিত অস্ত্ৰ এপাত উলিয়াই বহুৱাই দিলে তেওঁৰ বুকুত|

কোঁৱৰৰ কলিজা ফালি ৰং উলিয়াই তাই গুচি গ’ল সুৰৰ পাহাৰ বগাই...|


-------------------------

assamese poetry, Assamese poem, Best Indian Jokes

তাই কেনি গ’ল?

(১)
তাই সাৰ পালে
নিজকে দাপোণত চালে
অলপ ৰং ঘঁহি তাই ৰঙিলী হ’ল
বৰষুণত মুকুতা বুটলিবলৈ গৈ
তাই আকৌ মটীয়া হ’ল

(২)
আকাশে গৰজিবলৈ ধৰিলে
ভয় খাই তাই বাউলী হ’ল
ছাঁতে লুকাব পৰাকৈ
তাই এটুপি চকুলো হ’ল
বেলি ওলালত গৰখীয়াটোৰ চকুতে বহি
দূৰ পাহাৰলৈ তাই গুচি হ’ল

(৩)
বনে বনে বগাই
তাইৰ হাবিয়াসবোৰ অৱশ হ’ল
নিজকে শাঁত পেলাবলৈ তাই
এটি পাহাৰীয়া জুৰি হ’ল
যাওঁ নাযাওঁ খোজেৰে
সাগৰৰ বুকুত তাই এদিন হেৰাই গ’ল

An Assamese Poem by Santanu Changmai

Assamese Poem by Santanu Changmai

টুকুৰা কবিতা
________
১)ৰাস্তা
পথ এৰি পেলাই
পথ বিচাৰিলেই
পথ পোৱা যায়
সেই পথৰ পথিক
অচিনাকি
আপোন

২)অস্তাচল
আবেলিৰ বেলি
মাৰ যায়
এখিলা শুকান পাত
সৰি পৰে
কবিৰ কফিৰ কাপত
ডুব যায়

৩)পানী-দোঙা
শিলৰ দলঙ
তলত পানী
ৰুপোৱালী মাছ
ভাগৰত বুটলিছে
এমুঠি জিৰণি
সাৰ নোপোৱালৈকে

Assamese Poetry

শৈশৱৰে পৰা সপোনৰে সতে মোৰ লুকা ভাকু|
এটি সপোনে জিৰণি লৈছে মোৰ বুকুত মোৰ কলিজাটো সজোৰে খামুচি ধৰি|
সময় হ’লে ফুল ফুলিব, সুগন্ধি বিয়পিব- বুকুখন এখন জীপাল বাগিচা হ’ব!

Santanu Changmai

আবৃত্তি: Assamese Poem

জানো তুমি কবিতা নিলিখা...
যি দিনা লিখিবা
সেইদিনা মোৰ কথা ভাবিবা
শব্দৰ ফাঁকে ফাঁকে লুকাই
ম‍ই তাক ছন্দৰ পোচাক পিন্ধাম

বিস্ময় আলোচনীৰ সম্পাদক মান্যবৰ শশী ফুকন দাৰ সতে | Bismoi: Sashi Phukan

With Mr. Sashi Phukan (Editor, Bismoi)

Assamese Poem- টুকুৰাবোৰ গলিছে

Assamese Poem

ৰাতিৰ সাধু: একাংশ


......
তাৰ পিছত টোপনিত
ঢলি পৰিলা তুমি
খিড়িকীৰে সোমাই অহা
জোনৰ পোহৰখিনি
লাহে লাহে বগাই গ’ল
তোমাৰ চেহেৰা পাৰ হৈ 
এসাগৰ কৌতূহলৰ ফালে

July 2013, Guwahati

নিয়ম নমনা নৈ Assamese Poem

Assamese Poetry

-উপহাৰ- 

মোৰ চকুৰ দৃষ্টিৰে
এবাৰ চাই চা জীৱনৰ ৰং

দুখবোৰ আঠা লগা দি লাগি আছে
প্ৰতিজন পথচাৰীৰ চকুৰ গুৰিত
হুমুনিয়াহ লুকাই আছে
যেনেকৈ লুকায় আঁউসীত জোন
প্ৰতিটো বাঁহীৰ মায়াসনা সুৰৰ আঁৰত

দুখবোৰ পাওনা কৰি
কিস্তি কিস্তিকৈ
কিনিবি এদিন তইও
হালিজালি বাৰিষাৰ নিৰিবিলি ৰামধেনু
ভালপোৱাৰ ফাগুন, নৈপৰীয়া সন্ধিয়া

Assamese Poem

শ্বায়েৰী এটা বিচাৰি...



সঁচা মিছাৰ মাজতে

এটি ককটেইল আবেলি

চাহৰ কাপত কফি

আৰু দিলখুছ শ্বায়েৰী।



সপোনৰ মৰা-শ

লিৰিকি বিদাৰি

পচাবোৰ আঁতৰাই

কেঁচাবোৰ পখালি

অচিনাকি গলি এটালৈ

সোমাই যায় মাজনিশা

ভালপোৱাৰ টেকনিক নজনা

দুখন ভালপোৱাৰ পৃথিৱী।

মহাপাপীৰ সপোনবোৰ

অসমীয়া কবিতা

অংকুৰ- Assamese poem

অংকুৰ 

........

আজিও যে লৈ ফুৰোঁ জেপতে
ত‍ই দিয়া একমাত্ৰ প্ৰেমৰ চিঠিখন …
উঁৱলি যোৱা চিঠিখনত লাগি আছে
তোৰ উঁৱলি যোৱা কলিজাটোতকৈ 
অধিক উমাল শবদৰ মৰম
ছয়ফুট গভীৰ কবৰত 
পুতি আহিলি নেকি 
তোৰ বুকুৰ মৰমবোৰ
ইমান আৰ্তনাদ কৰে মোৰ আত্মাই
তথাপি দেখোন তোৰ কাণসাৰেই নাই

বহাগেও উচুপে

শেষ হৈ যাব বিচাৰোঁ
আঁতৰি যাব খোজোঁ দূৰ বহুদূৰ
তাৰ আগতে কথা পাতিব খোজোঁ 
কাৰোবাৰ সতে
এটা পূৰা দিন
পুৱাৰ পৰা গধূলিলৈ 
উমানন্দ, বশিষ্ঠ সোণাপুৰ 
পেপছি পিজ্জা ম’ম’ ঘৰ
যিমানকণ বাকী আছেগৈ উশাহ
তাৰে তোক ৰুই দি যাম 
এজুপি জীয়া গছ
শীত আহিলে গছজুপি নাঙঠ হ’ব
উচুপিব ওৰে ৰাতি
ত‍ই সাৱটি ধৰিবিচোন
মোৰে কথা এবাৰ ভাবি ... 

শান্তনু চাংমাইৰ কথাকবিতাৰ Blog

Santanu Changmai ৰ কেইটিমান কথাকবিতা: -

Assamese Kothakobita কথাকবিতা

ভালপোৱা

এইয়াই চাগে ভালপোৱা

কেতিয়াবা দূৰৈত চিকমিকাই থকা এক তৰাৰ জোনাক চুই চোৱাৰ হাবিয়াস
কেতিয়াবা ওচৰতে তিৰবিৰাই থকা ঢিমিক ঢামাক এক জোনাকী পৰুৱাৰ উল্লাস
এইয়াই চাগে ভালপোৱা
নতুনকৈ গজালি মেলিবলৈ লোৱা এক কুমলীয়া অচিন, অজানা পুলক
মৰীচিকা মৰীচিকা যেন লগা কিছু সময়ৰ লেহেমীয়া যাত্ৰা
এইয়াই চাগে ভালপোৱা
টগবগাই ঢপলিয়াই যোৱা যুজাঁৰু ঘোঁৰাৰ দুৰ্বাৰ গতি
হঠাতে লাজৰ ফুলৰ পাপৰি ছিটিকি পৰি চকুৰ মণিত যে বিৰিঙে লাজৰ আভা

____________

২২/০৪/২০১৩

খন্তেকৰ বাট

অসমীয়া কথাকবিতা

শ্বায়েৰী

তাইৰ কোমল হাতৰ পৰা পিচলি কিমান যে ভাগিল বস্তু...
কি কৰিম?
মোৰ থুনুকা হৃদয়খনো তাই এদিন হাততে তুলি লৈছিল!